Kasar North Korea ta sake daukar hankalin duniya bayan bullar rahotannin cewa an yanke wa wasu daliban makaranta hukuncin kisa. Wannan matsanancin hukunci ya biyo bayan kama daliban ne dumu-dumu suna kallon shahararren fim din nan na kasar South Korea, wato Squid Game.
A karkashin jagorancin Kim Jong-un, kasar North Korea tana da tsauraran dokoki game da shigo da fina-finai ko wakoki daga kasashen ketare, musamman ma daga makwabciyarta, South Korea. Dokar da aka kafa a shekarar 2020 ta haramta duk wani abu da aka kira da “tunanin reactionary da al’adu,” inda duk wanda aka kama zai iya fuskantar hukuncin kisa ko daurin rai-da-rai.
Kungiyar kare hakkin bil’adama ta Amnesty International ta tabbatar da cewa ta gudanar da bincike mai zurfi, inda ta tattauna da mutane kusan 25 wadanda suka tsere daga kasar. Wadannan mutane sun tabbatar da cewa:Kallon fina-finan South Korea kamar Squid Game, Crash Landing on You, da Descendants of the Sunma babban laifi ne.Hukuncin kallo ko rarraba wadannan fina-finai na iya kaiwa ga kisa ko tura mutum sansanin horo na azaba.
Fim din Squid Game ya samu karbuwa sosai a duk fadin duniya, inda yake nuna wasu mutane da ke fafatawa a wasanni na mutuwa domin samun kudi. Sai dai a North Korea, hukumomi na kallon fim din a matsayin wata hanya ta lalata tunanin matasan kasar da kuma nuna irin rayuwar kasashen da suke adawa da su.
Shin kuna ganin wannan doka ta dace don kare al’adun kasa, ko kuwa cin zarafin hakkin bil’adama ne? Rubuta ra’ayinku a sashen sharhi.
