BENIN, Najeriya – Rahotanni daga jihar Edo sun nuna cewa tsohon ɗan takarar shugaban ƙasa na Jam’iyyar Labour, Peter Obi, ya tsallake rijiya da baya bayan wani yunkurin hari da aka kai wa ayarin motocinsa a birnin Benin.
Lamarin ya auku ne a yammacin ranar Alhamis, yayin da Peter Obi ke kan hanyarsa ta komawa bayan kammala wata ganawar sirri da shugabannin jam’iyyar ADC a jihar. Ganawar dai ana kyautata zaton tana da alaƙa da tattaunawar kafa ƙungiyar haɗaka (merger) tsakanin jam’iyyun adawa don tunkarar zaɓe mai zuwa.A cewar wasu ganau, wasu matasa ɗauke da makamai sun yi ƙoƙarin tare ayarin motocin, inda suka yi awon gaba da wasu wayoyin hannu na waɗanda ke cikin ayarin, kafin jami’an tsaro su yi nasarar shawo kan lamarin.
Daya daga cikin na-kusa da Peter Obi, wanda ya nemi a sakaya sunansa, ya tabbatar da cewa: “Shugabanmu yana cikin ƙoshin lafiya kuma bai samu ko kwarzane ba. Wannan lamari ne na rashin tsaro da kowa ke fuskanta a ƙasar nan, amma muna godiya ga Allah da ya tseratar da mu.”
Tuni dai magoya bayansa, waɗanda aka fi sani da “Obidients”, suka cika kafafan sada zumunta da kiran gwamnati ta ƙara tsaurara tsaro ga shugabannin adawa. Zuwa yanzu, rundunar ‘yan sandan jihar Edo ba ta riga ta fitar da cikakkiyar sanarwa kan adadin mutanen da aka kama ba.
Shin kuna ganin wannan harin yana da alaƙa da siyasa, ko kuwa matsalar tsaro ce kawai ta gama-gari?
