halin yanzu, batun tsaron ruwa ya zama babban kalubale da ke barazana ga rayuwar bil’adama a fadin duniya. Rahotanni na baya-bayan nan da ke fitowa daga Majalisar Dinkin Duniya (United Nations) na gargadin cewa duniya ta riga ta shiga wani sabon yanayi mai cike da hadari da aka bayyana da “Global Water Bankruptcy”, wato yanayin fatan-bara ko kuma “fayace” na asusun ruwan sha na duniya.
Wannan gargadi ya girgiza hankulan masana da ma’aikata daban-daban, duba da cewa ruwa shi ne kashin bayan rayuwa. Kamar yadda binciken kimiyya ya tabbatar, dan adam zai iya jurewa kwanaki talatin ko fiye da haka ba tare da ya ci abinci ba, muddin yana samun ruwa. To sai dai, idan aka rasa ruwa na tsawon kwanaki uku kacal, rayuwar mutum tana shiga cikin mummunan hadari da zai iya kaiwa ga mutuwa. Wannan ya nuna muhimmancin ruwa da kuma girman hadarin da ke gabanmu.
Menene Ma’anar ‘Global Water Bankruptcy‘?
Idan aka yi maganar “Bankruptcy” a bangaren kudi, ana nufin mutum ko kamfani ya riga ya cinye dukkan kudaden da yake da su ko kuma wadanda ake shigo masa da su, ta yadda babu abin da ya rage a asusunsa. Haka lamarin yake a bangaren ruwa. Masana daga Hukumar Ruwa, Muhalli da Lafiya ta Jami’ar Majalisar Dinkin Duniya (UNU-INWEH) sun bayyana cewa, bil’adama suna amfani da ruwan da ya wuce kima idan aka kwatanta da yawan ruwan da dabi’a ke sabuntawa ta hanyar ruwan sama da sauran hanyoyi. Wannan yanayi na “fatan-bara” ya riga ya zama tabbatacce kuma ba za a iya dawo da asusun ruwan yadda yake a da ba (Irreversible); abin da ya rage kawai shi ne yadda za a sarrafa abin da ya rage (Management).
Dalilan Da Suka Kawo Wannan Hadari
Babban dalilin da ya janyo wannan matsala shi ne yadda bil’adama ke almubazzaranci da gurbata albarkatun ruwa a duk fadin duniya. Wadannan matsaloli sun hada da:
Almubazzaranci a Masana’antu da Noma: Ana amfani da ruwa mai yawa ta hanyoyin da ba su dace ba wajen ban-ruwa da kuma ayyukan masana’antu.
Gurbatar Ruwa: Zubda kwayoyin cuta da sunadarai masu guba a cikin koguna da asusun ruwa na karkashin kasa yana sanya ruwan ya zama maras amfani.
Sauyin Yanayi: Fari da dumamar yanayi suna busar da manyan koguna da madatsun ruwa cikin sauri.
Tasirin Matsalar Ga Mutane Biliyan 6
Binciken ya nuna cewa, kusan mutane biliyan shida (6 Billion) a fadin duniya sun dogara ne kacokan a kan wadannan asusun ruwa na karkashin kasa da ke fuskantar barazanar kafewa. Abin mamaki shi ne, kasashe daban-daban sun dade suna amfani da wadannan albarkatu ba tare da tsari na kwarai ba tun kafin shekarar 1951, inda aka kwashe mafi yawan ruwan da ke taskace ba tare da maye gurbinsu ba. Wannan ya sanya kasashe da dama fuskantar babban kalubale na samun tsaftataccen ruwan sha.
Masana sun ba da shawarar cewa, lokaci ya yi da kowane mutum zai canza dabi’unsa wajen amfani da ruwa. Ya zama dole a dakatar da almubazzaranci kuma a tabbatar ana amfani da kowace dusa ta ruwa ta hanya mafi dacewa domin ceto goben fadin duniya da kuma tsaron lafiyar al’umma baki daya.
Ziyarci shafinmu akai-akai domin samun ingantattun rahotanni akan muhalli da rayuwa.
