A wani babban ci gaba da aka samu a fannin kimiyya da fasaha, wani mutum-mutumi mai suna Smart Tissue Autonomous Robot (STAR) ya yi nasarar gudanar da tiyatar hada hanjin (anastomosis) wani mara lafiya ba tare da wani katsalandan ko jagora daga hannun dan adam ba.
Wannan babban aiki ya gudana ne a karkashin kulawar masana daga jami’ar Johns Hopkins da ke Amurka. Na’urar ta yi amfani da fasahar basirar kirkira (Artificial Intelligence) da kuma kyamarori na musamman don gano inda za ta dinka jikin mutum.
Babban abin da ya ba masana mamaki shi ne yadda dinkin da na’urar ta yi ya fi na kwararrun likitoci daidaito da kuma kyau. Wannan yana nufin cewa na’urar ba kawai tana kwaikwayon mutum ba ne, a’a, tana yin aiki ne da gwaninta fiye da yadda hannun dan adam zai iya.
Sau da yawa likitoci na yin kuskure saboda gajiya ko rawar hannu, amma inji ba ya gajiya.
Wannan zai sa ayyukan tiyata su zama cikin kankanin lokaci kuma marasa lafiya su warke da wuri.
Wannan nasara ta nuna cewa nan gaba kadan, na’urori za su iya gudanar da ayyuka masu wahala a asibitoci ba tare da bukatar kwararru da yawa a dakin tiyata ba.
da wannan nasara, akwai tambayoyi kan ko mutane za su amince a kwantar da su a gaban inji ba tare da likita ya taba su ba. Masana sun bayyana cewa, ko da na’urorin sun fara aiki gaba daya, har yanzu ana bukatar likitoci su rika sa ido don tabbatar da komai ya tafi daidai.
